Jeanette Syversen topper lista til fylkestingsvalet 2027

Nominasjonsmøtet i Raudt Vestland nominerte kandidatane til fylkestingsvalet i Vestland 2027 søndag 13. september. Øverst på lista står Jeanette Syversen frå Bergen.
Syversen har dei siste to periodane vore gruppeleiar for fylkestingsgruppa til Raudt i Vestland og leier også Raudt sitt folkevaldeutval. Syversen har brei yrkesbakgrunn med alt frå assistentjobbar i kommunen til vaskerimedarbeidar.– Vi er svært glade for at Jeanette Syversen takkar ja til å fortsetje som vår fremste fylkestingspolitikar. Gjennom si erfaring i 2 periodar representerer ho den naudsynte kontinuiteten som trengs for å bygge vidare på det gode arbeidet som er gjort, og samstundes sørge for at nye krefter får den naudsynte opplæringa i politikken til Raudt og arbeidsmåten i fylkestinget, seier leiar i nominasjonsnemnda, Geir Oldeide.

På andreplass har partiet nominert Bård Eggen frå Osterøy. 41 år gamle Eggen er lagermedarbeidar og tillitsvald i Fellesforbundet.

– Med Bård Eggen på fylkestinget får vi ei viktig arbeidar- og tillitsvaldstemme inn i fylkestinget, seier Geir Oldeide, og understreker arbeidet Eggen gjer i forsvar av sjukeløna.

Nominasjonsnemnda er nøgd med aldersspennet i innstillinga, både eldre og unge er godt representerte. Snittalder er 47 år og ein har lukkast med å få unge kandidatar høgt på lista.

– På tredjeplass har partiet nominert den 21 år gamle sjukepleiarstudenten Ariana Fjærestad frå Høyanger. Ho er eit stort politisk talent og vi forventar oss mykje av henne i kommande periode. Ungdommen er framtida og ho kjem heilt sikkert til å setje sitt preg på den.

Fjerdeplassen på lista går til helsearbeidar Johan Kuswania Nzungula Lavik frå Bergen. Den 31 år gamle Lavik er no vararepresentant til fylkestinget og får med seg nyttig erfaring fra fylkestingsarbeidet i denne perioden.

På femteplass vil nemnda ha noverande fylkestingsrepresentant Rita Tonning frå Førde. Tonning er 61 år og barnevernspedagog, og har lang røynsle frå både kommune- og fylkespolitikken.

– Vi er godt nøgde med lista som speglar breidda i partiet med mange tillitsvalde frå arbeidarrørsla og ei god aldersspreiing. Lista har òg god representasjon frå alle distrikt der alle regionane i både Sogn og Fjordane og Hordaland er representerte, samstundes som Bergen med sin store del av medlemene også er godt representert, seier Oldeide.