Grunngjeve spørsmål til Hordaland fylkesting 2. og 3. oktober 2018 om Bybanen / Keolis.
Dette spørsmålet stiller Terje Kollbotn på onsdag den 3. oktober i fylkestinget.
Fleirtalet i Hordaland fylkesting gjekk inn for på nytt å konkurranseutsetje Bybanen i Bergen, i staden for ein modell i eigenregi.
I slutten av august melder BA og andre media at det fransk-eigde Keolis har teikna ny kontrakt om drift av Bybanen, som er 100 % eigd av fylkeskommunen.
Samstundes melder media at Keolis regnar med eit stort overskot, samnstundes som sjåførar ikkje lenger har tid til å gå på toalett i arbeidstida, og riskikerer å pisse i buksa.
På dette grunnlag ber eg fylkesordføraren om å svare på fylgjande spørsmål:
1. Har den nye kontrakten med Keolis blitt dyrare eller rimelegare for fylkeskommunen?
2. Kor mange andre firma tok del i anbodsprosessen og kor langt unna låg dei i pris i forhold til Keolis?
3. Korleis er løns- og arbeidstilhøva (inkludert arbeidstid og pauser) og pensjonsrettar for dei tilsette fastsatt og regulert i den nye kontrakten med Keolis?
Terje Kollbotn (gruppeleiar Raudt Hordaland)
Følg gjerne Fylkestingsmøtet på fylkeskommunen sitt nett-tv.